Atuakkiortut

Lorna Byrne

Atuakkiortoq

Lorna Byrne (In. 1955) Irlandimiuuvoq inngilinillu meeraanerminiit attaveqartartuuvoq isikkuilu takusinnaasarlugit uagut inuit takuneqarsinnaanitsituulli. Lornap taamatut piginnaaneqarnini ukiorpassuarni isertuutereerlugu atuagaq Inngilit nutsanni 2008-mi saqqummersikkamiuk aatsaat avammut ammarpoq, aatsaallu siullerpaamik oqaluttuaraa inngilinik takunnittarnini qanoq pisarnersoq.

Lorna Byrnep qilammut majuartarfiit Trappetrin aamma atuakkiaraa, tassa neriunnermik aammalu qilammiit inngilineersumik asanninnermik oqariartuuteqartoq. Nunarsuaq tamakkerlugu atuakkiaminik atuartartorisani isumassarsitissimaqai, atuakkiaalu tamakkua nunat assigiinngitsut 50-t sinnilinni saqqummiunneqarsimapput oqaatsinullu assigiinngitsunut 28-nut nutserneqarsimallutik. Taamatuttaaq kalaallisut, – nutserisuulluni Karline Platou.

Inger Platou

Atuakkiortoq

Inger Platou 1956-mi nunaqarfimmi Oqaatsuni inunngorpoq, qatanngutigiinni 8-ni nr. 3-iulluni.

Inger Platou ilinniartitsisutut ilinniagaqartuusoq siornatigut atuakkamik saqqummersitsingisaannarsimavoq, aatsaalli 2024-mi IKUALA forlag aqqutigalugu “Aqqutima sangutinneqarnera” siullerpaamik saqqummersippaa, qallunaatuualu nammineq nutsikkani “Mit livs skillevej” 2025-mi aasakkut saqqummersillugu. Atuakkiorusunneranut ikitsitsisoq tassaavoq, Kalaallit Nunaani spiralilersuisimanerup eqqartorneqalernera, Ingerimi taannaavoq kalaallit arnarpassuit assigalugit 1970-kkut ingerlanerani inuttaata akuersissutigeqqaanngisaanik spiralilerneqarsimasut ilaat.

Inger Platou marlunnik colombiamiunik erneqarpoq maanna inersimasunngoreersunik.

Kristian Johansen

Atuakkiortoq

Kristian Johansen aamma Karinnguamik taaneqartartoq asimioqarfinnguami Killerni 1933-mi februaarip 3-iani inunngorpoq.

Piniartuinnaaq akornanni ilitsorigami piniartussatut aallarteqqaarpoq, 1958-milu kinguppanniutitaarpoq ukiunilu 19-ni kinguppanniarneq ingerlappaa.

1978-mi februaarip aallaqqaataani tiguinnakkatut oqaluffimmi pattattuusalerpoq, ukiullu 25-t sinnerlugit pattattuulluni, 1993-miit 1996-mut organitut ilinniarpoq.

Karinnguup erinnanik tussiutinillu nuutaanerusunik imalimmik IKUALA aqqutigalugu atuakkiani novemberimi 2024-mi 91-nik ukioqarluni saqqummersippaa. Erinnallu taakku ilaat 1800-kkornisaapput siornatigullu saqqummersinneqarsimasuunatik.

Inge Elgaard Egede

Atuakkiortoq

Inge Elgaard Egede, februarip 27-iani 1969-mi Narsami inunngorpoq, Narsami Igalikomilu peroriartorpoq. Ukiunilu 14-ni savaateqarfimmi Qorlortorsuarmi najugaqarluni.

Inge, sisamanik qitornaqarpoq pingasunillu ernutaqarluni.

Allaffimmiutut, EVU, akademisk Lederuddannelselu ilinniagaraa aammalu Allorfimmi nøglepersoniulluni.

Atuakkiani “Ikiortissarsiorneq nukittuneruvoq” IKUALA forlag suleqatigalugu atuakkiaani siullersaavoq.

Ingep atuakkioqqinnissani sulissutigaa.

Lars Karl Jensen

Atuakkiortoq

Lars Karl Jensen Qeqertarsuarmi ukiutoqqami 1949-mi inunngorpoq, ukiorpassuarni imarsioreerluni, Imarsiornermik ilinniarfimmi ukiuni 25-ni sulivoq, taakkunannga ukiuni 20- ni pisortatut sulilluni.

Lars Karl Jensen aamma politikkeritut ukiuni 12-ni sulisimavoq, Qeqertarsuarmi 2001-miit 2005-mut borgmesteriuvoq, Inatsisartunilu ilaasortaalluni 1995-miit 2002-mut. Aammalu KANUKOKA-mi siulittaasuusimalluni.

Siornatigut atuakkiorfik alla aqqutigalugu atuakkamik saqqummiussaqarpoq, Aalisarfittaarsuaq IKUALA forlag suleqatigalugu 2025-mi aasakkut saqqummiuppaa.

Karline Platou

Atuakkiortoq

Karline Platou Kuummiuni juulip 20-iani 1966-mi inunngorpoq, tusagassiortutut perorsaasutullu ilinniagaqarpoq, maannalu nutserisutut IKUALA-millu ingerlatsisutut suliaqarluni.

Karline Nuummi GUX-mi kalaallisut ilinniartitsisarnermini “KAMM..GAME” isumassarsiaraa Danmarkimullu nuukkami spilleliortarfimmi naqitertillugu.

Karlinep aamma allamiut atuakkiaat marluk kalaallisut nutserpai, tassaasut: Qatanngutigiinni sorliuit? (2017-mi kalaallisut saqqummerpoq) amerikamiumit Kevin Lemanimit atuakkiarineqartoq, aammalu “Inngilit nutsanni” Irlandimiup Lorna Byrnep atuakkiaa kalaallsiut nutserpaa 2023-milu saqqummersillugu, taakku tamarmik atuakkiorfiutaasa akuersinerisigut piviusunngorput.

Karline Platou marlunnik paneqarpoq, Evy aammalu Palleq.